ტელეკომპანიებისა და საზოგადოების საინფორმაციო პრიორიტეტების შესაბამისობის კვლევა

9 ნოე 2012

პროექტის შინაარსი გულისხმობდა სამი კომპონენტის ერთიანობას:

ა) აპრილიდან ოქტომბრის ჩათვლით, 7 ტელეკომპანიის მთავარი საინფორმაციო პროგრამის მონიტორინგს ორკვირიანი პერიოდების განმავლობაში. მონიტორინგის მიზანი იყო, გამოვლენილიყო თითოეული ტელეკომპანიის დღის მთავარ საინფორმაციო პროგრამაში (ორი კვირის განმავლობაში) ყველაზე ინტენსიურად გაშუქებული თემები.

ბ) მონიტორინგის საფუძველზე გამოვლენილი ინტენსიურად გაშუქებული (პრიორიტეტული) თემები მიეწოდებოდა თბილისში რეპრეზენტაციულად შერჩეულ 400 რესპონდენტს. რესპონდენტები ახდენდნენ პრიორიტეტული თემების რანგირებას პირადად მათთვის ამ თემების მნიშვნელობის მიხედვით. ამგვარი გამოკითხვა საშუალებას გვაძლევდა, დაგვენახა, ტელეკომპანიების მიერ ინტენსიურად შეთავაზებული თემებიდან რომელს ანიჭებდა უპირატესობას თბილისის მოსახლეობა.

გ) თემების ჩამონათვალის გარდა, რესპონდენტებს ვთავაზობდით, ეპასუხათ ერთ ღია შეკითხვაზე: „2012 წელი საპარლამენტო არჩევნების წელია. მოსალოდნელია, რომ ოქტომბერში დაგეგმილი არჩევნები კონკურენტული იქნება, ხოლო არჩევნების შედეგები - ქვეყნისთვის მნიშვნელოვანი. ახლა შეგეკითხებით, არჩევნებთან დაკავშირებით, რომელი თემების შესახებ გსურთ ინფორმაციის მიღება მედიასაშუალებებით?“ ამ კითხვაზე პასუხების ანალიზი საშუალებას გვაძლევდა, გაგვეგო, როგორი იყო საზოგადოებრივი დაკვეთა ტელევიზიების მიმართ წინასაარჩევნო პერიოდში.